كريسمس هديه سي
كريسمس هديه سي
یازان : او. هئنری
چئویرن : آیدا بیات
بيردولار سكسن يئددي سئنت. پولون هاميسي بو ايدي.بونون آلتميش سئنتيني ، پئني-پئني باققال ، اتچي و تره وزچي ايله آليش وئريشده چنه ووراراق توپلاميشدي. دئللا ، پوللاري اوچ كره سايدي. بير دولار سكسن يئددي سئنت. يارين كريسمس ايدي. بونا گؤره كؤهنه قولتوقدا اوتوروب آغلاماقدان باشقا اليندن بير ايش گلمه ديگي بللي ايدي. او بئله ده ائتدي.
گنج قادين قارا طالعينه آغلاماقدايكن ، ايذين وئرين اونون ائوينه بير گؤز آتاق.آپارتيمانين ايكينجي قاتيندا ، كيچيك دؤشلي بير ائو. اوتاق اسكيميش بير قيرميزي كليمله چوللانميش. آزاجيق ائو اثاثلاري كؤهنه و ايشدن دوشموشدور . آز اؤنجه ، دئللا اوستونده اوتوروب آغلاماقدا اولدوغو كؤهنه قولتوغو سؤيله ميشديك. اوتاغين ايكي پئجره سي نين آراسيندا ائنسيز بير گؤزگو آسيلي دير. آشاغي قاتدا ، اوفاجيق گيريش هاليندا ، پوستا قوتوسونون اوستونده "باي جيمز ديلينگهام يانگ " آديندا بير كارت گؤروروك. " ديلينگهام " آدي يوكسك آيليق آلديقلاري او خوش گونلري آنيمساتماقدادير آنجاق ايندي گليرلري خئيلك آشاغي دوشموش ساده بير "د" داها اويغون گؤرونور. آمما باي جيمزديلينگهام ائوده دؤنونجه "جيم " دئيه اؤپوشله اونو قارشيلار بايان جيمز ديلينگهام يانگ (آز اؤنجه دئللا آدي ايله تانيتديق).
دئللا آغلاماغي بيتريب بير آزجيق پودور ياناقلارينا سوردو. پنجره نين اؤنونده دايانيب بوزومتول حيطده كي بوز باراماقليقلارين اوستونده گئدن بوز پيشگي ايزله مگه باشلادي . يارين كريسمس ايدي. اونون ايسه ، جيمه هديه آلماسي اوچون يالنيز بير دولار سكسن يئددي سئنتي وار ايدي. بو اونون آيلارجا پئني – پئني بيريكديرمه سي نين سونوجو ايدي. ائوين گئديري سانديغيندان داها چوخ ايدي. جيمه هديه آلماق اوچون يالنيز بير دولار سكسن يئددي سئنتي وار ايدي. او جيمه ياراشان هله اوسته ليك آز تاپيلان بير نسنه نين اوستونده دوشونمكده نه سئوينجلي آنلار كئچيرميشدي.
دئللا آنسيزين ، پنجره نين قاباغيندان دؤنوب گوزگونون قارشيسيندا داياندي. گؤزلري پاريلداييردي. آنجاق قيسا بير سوره ايچينده رنگي قاچدي. چابوق ، ساچلاريني آچيب بويوجا آشاغييا ائنديردي. اسكيدن ،جيمز ديلينگهام يانگين چوخ اؤيوندوگو ايكي شئي وار ايدي: بيرينجيسي بؤيوك آتالاريندان اونا يئتيرن آلتين ساعات، ايكينجيسي ايسه دئللانين ساچلاري. اونلار، هر كراليچه نين او ساچلاري و هر كرالين او ساعاتي چكنمه ديگينه اينانيرديلار!
دئللانين قهوه رنگلي گؤزل ساچلاري بير چاغلايان (شلاله ) كيمي چيگنيدن آخاراق توپوقلارينا يئتيشيب بورونجك كيمي اونو چولقالاييردي. سونوندا سينيرلي بير دورومدا ساچلايني توپارلاييب سانجاقلادي. بير- ايكي دامجي ياش گؤزلريندن ييپرانميش قيرميزي كيليمه دامجيلايينجا بيرآن دوراقسانيب داياندي. او قهوه رنگلي بؤرك و كوتونو گئينيب پاريلدايان گؤزلرله قاپييا دوغرولاراق باساماقلاردان آشاغييا ائنيب خيابانا چيخدي.
دئللا تله سيك خيابانلاري دولاشديقدان سونرا تابلوسوندا " بايان سوفروني ، هر چئيشد ساچ" يازيلميش بير آتئليه نين اؤنونده داياندي. ايكينجي قاتا چيخدي. بايان سوفروني ، شيشمان ، سولغون و بير آز سايغي سيز بير قادين ايدي. اونو سوفروني كيمي بير گؤزل آدا چتين اوخشاتماق اولوردو.
-: " ساچلاريمي آليرسينيز مي؟" دئللا سوروشدو.
-" ايشيم بودور." بايان يانيتلادي. " بؤركونو گؤتورده باخيم ".
قهوه رنگلي ساچلار يئنه آشاغييا شورلاردي. بايان ساچلاري يوخلاييب " ييرمي دولار " دئدي.
-" تئز وئرين " دئدي دئللا.
ايكي ساعات ايچريسينده ، بوتون ماغازالاري گزدي آنجاق سونوندا ايسته ديگيني تاپدي. او گئرچكدن جيمدن باشقا بير كيمسه يه دوزلمه ميشدي. بير پلاتين ساعات زنجيري ايدي. ساده آنجاق اوستون بير ال ايشي ايدي. اونو آلمالي اولدوغونو بيليردي. ييرمي بير دولار اؤده ييب قالان سكسن يئددي سنئتي ايله ائوه قوشدو. ساعاتين دگرلي اولدوغونا باخماياراق ،زنجير يئرينه كؤهنه مئشينله باغلاديغيندان، جيم اونو گؤزلرين اؤنونده چيخارتماقدان اوتانيردي اينديسه بو گؤزل زنجيرله اونو هرياندا چيخاريب باخا بيلر دئيه دوشونوردو دئللا.ائوه چاتينجا دويغوساليقدان چيخيب گئرچكليك دونياسينا واردي . ساچ قيوريلداني گؤتوردو . گازي يانديريب چاليشدي كورلانميش ساچلاريني دوزلتسين. قيرخ دقيقه ايچينده باشي نارين- نارين قيورجيقلارلا دولدو. چوخراق اوغلان اؤيرنجيلرينه اوخشاييردي. او ياپديغيني اؤزنله گوزگوده گؤزدن كئچيردي.
-: "اومارام جيم بو ايشيمدن قيزماسين " دئيه دئييندي." آخي ، نئيله يه بيلرديم . بير دولار سكسن يئددي سئنتله نه آلا بيلرديم كي؟"
تاوا اوجاغين باشيندا ايستي له نير. جيم هئچ واخت گئجيكمزدي. دئللا زنجيري الينده توتاراق جيمين هئپ گلديگي يئرده قاپي نين آغزينداكي ماسانين آرخاسيندا اؤتوردو. آياق سسلري گلدي. دئللانين اورگي دؤيونمه يه دوشوب رنگي قاچدي. قاپي آچيلدي. جيم ايچريه گيريب قاپيني باغلادي. او سئويملي آنجاق چوخ جيددي گؤرونوردو. ييرمي ايكي ياشي وار ايدي و بو ياشلا بير عاييله ني دولانديرمالي. يئني بير پالتو گره كيردي اونا . هله اوسته ليك الجگي بئله يوخ ايدي. جيم قاپي قاباغيندا دوندو. گؤزلريني تيكدي دئللايا. اوزونده دئللانين اوخويا بيلمه ديگي بير آنلاتيم (ايفاده) وار ايدي. بو دئللاني قوخوتدو. بو آتلاتیم نه قيزغينليق ايدي نه ده شاشقينليق ، نه قيناما ايدي نه اؤفكه بلكه ده بير باشقا دويغو ايدي. جيم، ماتديم-ماتديم باخا قالميشدي. دئللا ماسانين آرخاسيندان قالخيب جيمه ساري گئتدي.
-: " سئوگيليم جيم ! ائله باخما منه . اوره گيم ايسته ييردي سنه بير كريسمس هديه سي آلام . اونا گؤره ساچلاريمي كسيب ساتمالي اولدوم. ساچلاريم يئنه اوزاناجاق . سن اؤنمسه مز سن دئييل مي ؟ بيليرسن ساچلاريم تئز-تئز اوزانار. جيم من بو ايشين زوروندا ايديم . جيم! كريسمسيمي قوتلادا سئوينه ليم. بيلميرسنكي سنه نه گؤزل هديه آلميشام؟ ".
-: " سن ساچلاريني ووردونمو ؟ " جيم گؤردوگونه اينامير كيمي آستاجا سوروشدو.
-: " كسيب ساتديم " دئدي دئللا. " سن مني بئله سئويرميرسن مي؟ منم سنين دئللانام يالنيز ساچسيز. باخ!".
جيم ماراقلا اوتاغين دؤرد بوجاغينا گؤز گزديردي.
-: " سن دئييرسن مي ساچلار گئديب؟".
-: " اونو آراماغا گره ك يوخ" دئدي دئللا . " دئديم كي ساتديم گئتدي. كريسمس گئجه سي دير. بير آز سئويملي اول جيم . من اونو سنين اوچون ياپديم. ايندي شامي گتيريرم ".
جيم كوهنه پالتوسونون جيبيندن بير باغلي چيخارديب ماسانين اوستونه آتاراق :
-: " يانليش آنلاما مني دئللا " دئدي. " هئچ شئي سنه اولان سئوگيمي اورگيمده آزالدا بيلمز . ساچ وورمان بئله .آنجاق باغليني آچارسان ندن سارسینتی کئچیردیگیمی آنلاياجاقسان".
دئللا آغ بارماقلاري ايله باغليني سؤكوب آچينجا سئوينجدن بير چيغليق قوپاردي آنجاق چوخ تئز بو موتلوق گؤزياشلاريندا بوغولدو. جيم اونو قوجاقلاييب ارككجه سينه اونو اووتماغا چاليشدي. هديه ، دئللانين چوخدان برودئي ماغازاسي جاماكاسيندا گؤروب حئيران اولدوغو بير تاخيم باش داراغي ايدي. گؤزل داراقلار ، داش – قاشلا سوسلنميش، تام ساچلاري نين رنگينه اويغون اولاراق قهوه رنگلي ايدي. داراقلارين چوخ باهالي اولدوغونو بيليردي آنجاق اونلارا يييه اولاجاغي عاغليندان بئله كئچميردي. اينديسه اونلار بوردا ايدي آمما تاخيلاجاق ساچلار گئتميشدي. دئللا داراقلاري سيم – سيخي الينده توتاراق قيزارميش گؤزلرله باشيني قالديريب گوله – گوله :
-:" منيم ساچلاريم تئز اوزانار جيم" دئدي. سونرا پيشيك بالاسي كيمي سيچراياراق ائكه دي:
-" ائي واه ! ".
جيم هله هديه سيني گؤرمه ميشدي. دئللا ذوق ايله اونو جيمه اوزاتدي. دگرلي مئتال اونون الينده پارلايير كيمي گؤرونوردو.
-: " گؤزل دير، دئييل مي جيم؟ من بونو تاپماق اوچون شهري آلت – اوست ائتديم. آرتیق زاماني بيلمك اوچون گونده مين كره ساعاتينا باخا بيلرسن. ساعاتين وئرده باخيم گؤروم زنجيرله نئجه گؤرونور؟".
جيم سؤزو ائشيتمه ميش كيمي قولتوقدا اوتوروب اللريني بوینوندا کنتله یه رک گولومسه دي.
-: "دئللا ! ايذين وئر كريسمس هديه لريميزي بير باشقا گونه ساخلاياق . اونلاردان ايندي يارارلانسايديق چوخ ياخشي اولاردي آنجاق من سنين داراقلارينی آلماق اوچون ساعاتيمي ساتديم. اينديسه منيم فيكريمجه واختي دير گئديب شامي چکه سن " .
نوبئل ادبيات اؤدولو قازانان قادينلار
Selma Lagerlöf
سئلما لاقئرلؤف (۱۹۴۰-۱۸۵۸) ايسوئچلي يازار. افسانه لره و ناغيللارا دايانان ياپيتلاريلا تانينميشدير. نوبئل ادبيات اؤدولو آلان هم ايلك قادين ، همده ايلك ايسوئچلي يازاردير.
Grazia Deledda
قرازييا دئلئدا (۱۹۳۶-۱۸۷۱) ايتاليالي يازاردير. دوغاجيليق آخيمي نين اؤنده گلنلري نين آراسيندا قبول ائديلير. اثرلرينده سادونياداكي زولو ياشام قوشوللاريني تصوير ائدير. ۱۹۲۶ دا ادبيات داليندا نوبئل اؤدولونه لاييق گؤرولدو.
Sigrid Undset
زيگريد اوندئست (۱۹۴۹-۱۸۸۲) نوروئژلي يازار. اثرلرينده گلنكلر و چاغداشلاما چاتيشماسي ايله ديني دگرلري و قادينين اؤزگورلوگونو اله آلير. ۱۹۲۸ ده "The Axe", "The Snake Pit", "The Wilderness" ve "The Son Avenger" باشليقلاريني داشييان "The Master of Hestviken" دؤرتلَمه سيله نوبئل ادبيات اؤدولونو قازانميشدير.
Pearl Sydenstricker Buck
پيريل .س. باك (۱۹۷۳-۱۸۹۲) آمريكانين ايلك نوبئل آلان قادين يازاريدير.۱۹۳۱ ده " ياخشي دونيا" آدلي ياپيتيلا پوليتزئر اؤدولونو قازانميشدير. پيريل باكين كيتابلاري عؤمرونون بؤيوك بير قيسميني گئچيرديگي چينده كي ياشاميني يانسيندير. آنا كيتابي ايله نوبئل ادبيات اؤدولونو آلميشدير.
Gabriela Mistral
قابريلا ميسترال (۱۹۵۷-۱۸۸۹) شيلي لي شاعير و ديپلومات. ۱۹۴۵ ده ادبيات داليندا نوبئل اؤدولونو آلدي. بو اؤدوله لاييق گؤرولن ايلك لاتين آمريكالي اولدو.
Nelly Sachs
نئلي ساچز (۱۹۷۰-۱۸۹۱) آلمانلي يازار و شاعير. اثرلرينده ساواشين اينسان اوزه رينده كي تخريباتيني قونو ائتدي. تؤورات و يهودي گلنگي تئمالارينا آغيرليق وئردي.۱۹۶۶ ده نوبئل ادبيات اؤدولونو شاموئيل يوسئف آقنون ايله پايلاشدي.
Nadine Gordimer
نادين قورديمئر ۱۹۲۳ دوغوملو گونئي آفريقا يازاري. ۱۹۷۴ ده من بوكير اؤدولونو و ۱۹۹۱ ده نوبئل ادبيات اؤدولونو قازانميشدير.
Toni Morrison
توني موريسون ۱۹۳۱ دوغوملو آمريكالي نوبئل اؤدللو يازار. موريسون " آفريقالي- آمريكالي " ادبياتي نين تانينماسي و گليشمه سينده اؤنملي رول اويناميش، اورتكن بير يازاردير. "سئوگيلي" آدلي رومانيلا ۱۹۸۸ ايلينده پوليتزئر اؤدولونو قازاندي. اثرلري موريسونا آيريجا ۱۹۹۳ ايلينده نوبئل ادبيا اؤدولونو قازانديردي.
Wisława Szymborska
ويسلاوا شيمبوريسكا ۱۹۲۳ دوغوملو پولونيالي (لهستان) شاعير. چاغداش پولونيا شئعري ني اؤنده گلن تمثيلچيلريندندير. ۱۹۹۶ دا نوبئل ادبيات اؤدولونو آلدي.
Elfriede Jelinek
ائلفريده جئلينك ۱۹۴۶ دوغوملو آووستوريالي (اوتريش) فئمينيست اويون يازاري و رومانچيسي،۲۰۰۴ ايلينده نوبئل ادبيات اؤدولونو آلميشدير.
Doris Lessing
دوريس لئسينگ ۱۹۱۹ دوغوملو بريتانييالي يازار.
دوريس لئسسينگ، 1919 دا باباسي نين بير بانکانين يؤنئتيجيليغيني ياپتيغي ايرانين كيرمانشاه اياليتنده آنادان اولدو. بئش ياشيندا عاييله سيله بيرليكده زيمباووه (رودئزيا) سينيرلاري ايچينده بولونان بير كنده داشيندي. ساليسبوريده بير کاتوليک اوخولوندا ائييتيم گؤردو. 14 ياشيندايکن عاييله سينه عوصيان ائده رك اوخولو بوراخدي و سيراسييلا شفقت باجيسي، تئلئفون اوپئراتؤرلوغو و کاتيبه ليک اتئدي. 18 ياشيندا رودئزيا پارلمانيدا چاليشماغا باشلادي و اؤلكه ده ايرقچيليق-قارشيتي بير سول پارتي نين قورولماسيندا رول آلدي. 1943 ده سونا ائرن ايلک ائوليليگي نين آرديندان کومونيست پارتيسينه قاتيلدي و آلمان سياسي ائيلئمجي گوتتفريئد لئسسينگ ايله ائولندي. 1949دا ائشيندن و رودئزيادان آيريليب اوغلويلا بيرليکده لوندونا (لندن) گلدي. او تاريخدن بري ياشاميني پروفئسيونال بير يازار اولاراق لوندوندا سوردورور.
لئسسينگ چوخ ساييدا روماني و قيسا حيكايه سينده ، داها چوخ 20. يوزايلين توپلومسال و سياسي قارماشاسينا ياخالانميش بيرئيلرين ياشاملاريني اله آلير. اثرلري نين باشليجا تئمالاري نين فئمينيزم، جينسييتلر آراسي ساواش و بوتونلوک پئشينده قوشان بيرئيلر اولدوغو سؤيله نه بيلير. لئسسينگين چوخونلوقلا آفريقانين گونئيينده يا دا اينگيليسده گئچن اثرلرينده كي سولچو، باغيمسيزليغينا سون درجه دوشکون و فئمينيست قادين قهرمانلار، عيني يازارلاري كيمي، ايچينده ياشاديقلاري توپلوملارين کولتورل قيسيتلامالارينا قارشي باش قالديرير. ان چوخ اوخونان و ان چوخ چئوريلميش روماني آلتين دفتر (1962)، قادين حركتي نين کؤشه داشلاريندان بيري اولاراق گؤرولور.
۲۰۰۷ ايلينده نوبئل ادبيات اؤدولونو قازاندي . بو اؤدوله لاييق گؤرونن ان ياشلي آدامدير.
كيتابلاريندان ، "آلتين دفتر" ، " گزه گنلر" ، " ائوليليكلر" ، ايچينده ياشماغي سئچديگينيز حبس خانالار"، "جهنمه ائنيش اوچون آچيقلاما" و " ائولنمه ين آدامين حيكايه سي"- سايماق اولار.
Herta Müller
هئرتا مولئر ۱۹۵۳ دوغوملو رومانيالي يازار و شاعير.چائشئسكو دؤنميده رومن خالقي نين ياشاميني آنلاتديغي اثرلري ايله تانينميشدير. رومانچي ريچارد واگنئر ايله ائولي اولان مولئر رومانيادا گيزلي سئرويسله چاليشماغي رد ائده رك ايشدن اولموش و ۱۹۸۷ ده آلمانيايا كؤچموشدور.
ائسوئچ بيليم آكادئميسي طرفيندن ياييملانان آچيقلامادا ، رومانيا دوغوملو آلمان يازار مولئرين 2009 نوبئل ادبيات اؤدولونو قازانديغيني بيلديردي. مولئرين بو اؤدولو، " شئعرين سيخليغي و نثرين آچيقليغيني قوللاناراق يوخسوللارين دونياسيني تصويري ايله " آلديغيني قئيد ائديلدي.
كيتابلاريندان ، " تولكو داها او زامان آوچي ايدي" و " اوركده كي حئيوان "- ني آد آپارماق اولار.
توپلايان : آيدا بيات
قايناق : ويكي پئدييا
دونيا چاپيندا تانيميش اؤزبك قادين شاعيري : زولفييه
زولفييه(ايسراييلووا) ،1915 ايلينده اؤزبكيستانين تاشكند شهرينده آنادان اولموشدور. 1931-1934 ايللر آراسي خاتين قيزلار يوکسک اوخولونو و تاشکند پئداگوژي انستيتوسونو بيتيرميشدير .سونرا ادبييات قونوسوندا يوکسک ليسانس آلميشدير. داها سونرا ادبييات نشريياتيندا بؤلوم باشقاني(1941-1950) اولاراق چاليشميشدير. 1953-1980 ايللرينده اؤزبکيستان قادينلاري نين درگيسي " صدف'ده باش يازار گؤروينده چاليشميش سون قيرخ ايل ايچينده يتيشن بوتون اؤزبک شاعيره و يازارلارينا اوستادليق ائديب يارديم ائتميشدير.
زولفييه آدي، ساده جه اؤزبکيستاندا دئييل، بوتون دونيادا تانينماقدادير. اونون ايله ايلگيلي اولاراق اؤزبک انسيکلوپئديياسيندا بئله يازيلميشدير. " اؤزبک شاعيره سي و قزئته چيسيدير. اؤزبكيستان خالق شاعيري (1965)، نم (1968)، همزه (1969) و نيلوفر (1970) اؤدوللري نين صاحیبيدير. "
زولفييه، ياراديجيليغينا اون بئش ياشيندا باشلاميشدير. ايلک کيتابي " حيات ورقلري" 1932 ايلينده ياييملانميشدير. " قيزلار قوشيغي " (1938)، " شئعرلر " (1939) كيمي کيتابلاريندا اؤزبک قادينلاري نين دويغولاري، حياتا آکتيو اولاراق قاتيلماغا دعوت واردير. شاعير، ساواش ايللرينده اؤز دؤنََمي نين دويغو و غايه لريني يانسيتديغي " هولکر " ، " اوني فرهاد دئر ائديلر " (1943)، " هيجران کونلريده " (1944) آدلي کيتابلاريني ياييملاميشدير.
1944ايلينده شاعيره نين اوستادي و حايات يولداشي حاميد عاليمجان، ترافيک قضاسي گئچيريب وفات ائتميشدير. بوندان سونرا شاعيره، عؤمور بويو هيجران شئعيرلري يازميش، بو قونو اونون ياراديجيليغيندا آيريليقلا ايلگيلي کيتابلارا يانسيميشدير.
شاعيره، اؤز باشيندان گئچنلري و گئرچک تاريخي شخصيتلر حاققيندا دستانلار يازميشدير. " اوني فرهاد دئر ائديلر " آدلي دستاني، ساواشدا وفات ائدن صنعتچي قابيلجان صيدديقوو حاققيندا؛ " سوراکليدي شاعيرني شئعريم " آدلي اثري، حاميد عاليمجان حاققيندا، " قوياشلي قلم " آدلي دستاني ايسه مشهور يازار آيبک حاققيندادير.
شاعيره نين " قار " (1952)، "بيزنينگ آنه لر " (1953، " قيزچئمگه " ، "اوچراشوو" (1954) كيمي کيتابلاري اوشاقلارا يازيلميشدير.
اونون " من تانگني کويلئيمئن (من تاني ترننوم ائديرم) " ،" اوغليم، سيره بؤلميدي اوروش(اوغلوم اصلا ساواش اولماياجاق) " (1954)، "موشاعيره " (1958)، " اويلر(دوشونجه لر) (1965) ،كيمي اونلارجا شئعير کيتابي و روسجا اولاراق چيکميش کيتابلاري، زولفييه ني بوتون يوردا تانيتميشدير. شاعيرين " تئن-لئنگن اثرلري(سئچمه اثرلري) 1959، ايلينده ياييملانميشدير. سونرا اونون اوچ جيلدليک " اثرلري " (1985) ياييملانميش و بو کيتابا شاعيرين بوتون عؤمرو بويونجا يازديغي شئعيرلري و دستانلاري داخيل ائديلميشدير.
زولفييه، اؤزبک چئويرمه صنعتي نين گليشمه سينه ده بؤيوک قاتقيدا بولونموشدور. او، ن. نکراسوو، ل. اوکراينکا، س. نريس، و. اينبر، س. کاپوتيکينيان، م. کريم،. ن. حيکمت، م. ديلبازي، آ. پريتامين شئعيرلريني اؤزبک اوخوجوسونا تانيتميشدير.
شاعيره نين شئعيرلري، اينگيليس، آلمان، هيند، چين، فارس و بولقار ديللرينه چئوريميشدير. او، اولوسلار آراسي " نئرو " و " نيلوفر " اؤدوللرينه، " لئنين " مئدالينا، اوچ دفعه " محنت قيزيل بيراق " مئدالينا ، بولقاريستانين " کيريل " و " مئفودي " مئدالينا " سوسياليستيک محنت قهرماني " و " اؤزبکيستان خالق شاعيري " عونوانلارينا لاييق گؤرولموشدور.
شاعيره، 1995ايلينده وفات ائتميشدير. اونون وفاتيندان سونرا آدينا اؤدول قويولموشدو.
سن قَيده سن يورگيم
قلب بولگنده ييراقده
ايراده ائکن عاجيز.
دوستلر هم کوپ اطرافده،
امما مئن يککه-يالغيز...
بيردن قلبيم کئکسريب،
قان هم قاچدي يوزيمدن.
سئن، سيرداشني اَختريب،
خيال کئتَر ايزينگدن.
قيگه کئتدينگ، يورگيم،
بيتدي برداش و طاقت.
صوحبتينگدير تيلَگيم،
تيلده حسرتيم قت-قت.
کوپدير اَيته جک سؤزيم،
اوگيتلرينگگه زارمئن،
ييغلَيسن دئب دوستلريم
طعنه قيلر. نئتَي مئن؟
ساووش بئرمه يدي مئنگه
ياقيب کئتگه نينگ آلاو.
نئتي، يئتمَيمن سئنگه،
اورتَگه تَشَلنگن غاو.
عشقه مسکن يورگيم،
تاپيب بئر دئب قيستيدي.
نيمه قيلي، بئرهم-
روحيم سئني ايسته يدي
سئنسيز
منه، بير عؤمرني يَشه ديم سئنسيز،
قَيتمس شادليکلرنينگ قيتيشين کوتيب،
تابوتينگ باشيده چوککه نيمده تيز،
فرزندلر کوتردي قوليمدن توتيب.
شوندن بئري تيکمن. هر نئگه قلقان،
بختگه، بهارگه هم، قيشگه، قيغوگه.
بيراو عزاسيده ييغلَيمن قان-قان،
توييده يَيرَيمن اوخشَب آهوگه.
لئکين قالگَنيمده قلبيم-له تنها،
تويغولر زاريگه سالگنده قولاق.
اوزني ضعيف، چنقاق سئزگنده گاها،
الَمدن بئرمن جوابسيز سوراق:
تيريک ائکن نئگه تَشلب کئتمه دينگ؟
مئندن نفيسراقنينگ حوسنيگه عاشيق،
مئندن يانيقراغي تارتمه دي سني،
ائدي نيگاهينگگه بار جنّت آچيق،
سئني مجنون ائتيب بير يئر گؤزلي،
نئگه مئني تشلب کئته وئرمه دينگ؟
تيريک اَيريليشنينگ داغي آغيرميش،
خورليک کئميررميش عؤمرني چينَب!
بو-مودهيش ائگاوگه بئررديم توريش،
کئتسنگ هم مئنگه جان تويغونگدن اَينب.
بيلرديم، قيده دير آلسن نفس،
مورککب بو دونيا سئن-چون هم تيريک.
سئنگه يات-ناشادليک، توند روحليک، قفس،
بوگونگي قدمينگ کئچه دن ييريک.
نئگه، نئگه مئني تشلب کئتمه دينگ؟
بيله من، رشک مئني ائتردي هلاک،
افضل کورگه نينگني قَرغب اوترديم،
ايزينگدن يورمسديم سايه دَي غمناک،
حياتده مئن اوچون قالردينگ تيريک،
قلمينگ موجده سين کوترديم موشتاق.
مايوس تقديرينگگه يَشب مئن شريک،
موشکول بولياتير شادليک يرتماق.
نئگه تيريک ائکن تشلب کئتمه دينگ،
تشلب کئتمه دينگ-ده، باشلب کئتمه دينگ؟!
كؤچورن :آيدا بيات
زولفييه آدلي اؤدول
آذربايجان قادين آشيقلاري : آشيق فاطما خانيم كمينه (۱۸۹۸-۱۸۴۱)
۱۹ .نجي يوزايلين قادين آشيقلارينداندير. 1841-جي ايلده شوشادا دونيايا گليب. فاطما خانيم کيچيک ياشلاريندان اعتيبارن شعئيره ماراق گؤسترميشدير. شاعيره نين آتاسي ميرزه بگ بابا دا شاعير اولوب و " فنا " تخلوصو ايله شعئير يازيب. تحصيليني شوشادا آليب، ساوادينا گؤره اونا " ميرزه فاطما خانيم " دئييرديلر. 19.نجي يوزايل تذکيره لري آراسيندا دا شاعيره نين شئعيرلرينه راست گلينير. او دؤورده فاطما خانيم آزربايجانين ان تانينميش 3-5 شاعيره سيندن بيري اولوب.
شاعيره اونونلا بير دؤورده ياشايان بير چوخ آشيغين شئعيرلرينه نظيره لر يازميشدير. آما دؤوروموزه اونون اساسن کلاسسيک شکيلده يازيلميش شئعيرلري گليب چاتميشدير.
فيروديدون بَي کؤچرلي فاطما خانيم کمينه ني " ناديره- يي زمانه " سايميش، اونون اؤلومونو آغير ايتکي کيمي ديرلنديرميشدير.
فاطما خانيم کمينه 1898 -جي ايلين سئنتيابريندا شوشادا وفات ائتميشدير.
ياراديجيليغي
کمينه خانيمين حيات و ياراديجيليغي حاقيندا 19. يوزايل تذکيره لرينه آز دا اولسا بيلگي واردير. مثلا، مير مؤحسون نوواب " تذکيره- يي-نوواب " اثرينده کمينه خانيم حاقيندا معلومات وئررکن، بيلديرميشدير کي، او، دؤرد يوزه ياخين شعر يازميش، شوشادا مير مؤحسون نووابين باشچيليق ائتديگي " مجليسي-فراموشان " دا ياخيندان ايشتيراک ائتميشدير. کمينه شاعيره ناتوانين باشچيليق ائتديگي " مجليسي-اونس " ادبي مجليسين عوضولري ايله ياخين اولموش، اونلارلا شئعيرلشميشدير.
قالينجا
شيکار اولوب الدن اله دوشمه سين،
قورولموش تورلارا، فئعله دوشمه سين،
يامان گؤزه، يامان ديله دوشمه سين،
قان آغلارام قوربت ائلده قالينجا.
بير واختلار قاپانجيدا ساخلادين،
ظابيطي نين گؤزلريني باغلادين،
عبث يئره قفيل آچيب توللادين،
دينجلمرم تا بير سوراق بيلينجه.
صياد اولوب، اوو دالينجا گئتمزديم،
دونيادا چوخ غم وغوصه ائتمزديم،
هئچ بير کسين اتگيندن توتمازديم،
ايندي تا يالواررام روسواي اولونجا.
بير صيادين الدن گئتدي ترلاني،
تا عؤمرونه فلک سالدي نالاني،
چاغيرير هر زامان قادير موللاني،
آغلاييبان هر دم اونو دئيينجه.
باهار اولجاق، شاهبازيمي، اوو ائيله دين،
اونوتدون منزيلين، مأوان نئيله دين؟
نه بير گلدين چمن وصفين سؤيله دين،
نه سئير ائتدين گول چيچکلر سولونجا.
سمندر تک اود توتوبان يانسايدين،
هر باهار گر خئيير سرين بيلسئيدين،
آليب قوجاغينا باغرا باسسايدين،
کسيدين اللرين اوندان اوزونجه.
بير مودت گئديبن قوربتده قالديم،
هر يانا باخديقجا حئيرتده قالديم،
نه بير سس ائشيتديم، نه سوراق آلديم،
تکببور ائيله ديم ناحاق دالينجا.
ائي کاش کي، اولمايايدي دونياده،
عؤمور معموره سين وئريبن باده،
غم-غوصه چکمه يه اولوب آماده،
لنگ اولايديم مؤحنت سويون ايچينجه.
وطندن ال چکيب، باش گؤتدو قاچدي،
يووادان چيخيبان بال و پر آچدي،
جانيمي چوخ يانار اودلارا ساچدي،
قان آغلارام او غوربتدن گلينجه.
نه بيلمه دي سئودا، نه ده دويمادي،
نه راحت بير منزيلينده اويمادي،
نه چمندن، نه چيچکدن دويمادي،
من ده اونو بير گؤريديم دويونجا.
آي آغالار، بير ترلانيم اوچوبدور،
ساغ اليمدن، سول اليمه آلينجا،
اونو توتان خئيرين بهرين گؤرمه سين،
من فقيرين ناله سي وار دالينجا.
پئييله تا بير تولگي قويمارام،
اينتيظاردان گؤزوم يوموب اويمارام،
گئجه-گوندوز اييله مکدن دويمارام،
صيادييام او ترلانين، اؤلونجه.
يوز مين صياد اولسام توتا بيلمه رم،
دالينجا يوگوررم چاتا بيلمه رم،
جيلقيسين بيلمه سه م، ياتا بيلمه رم،
گؤز ديکرم يوللارينا، گلينجه.
کمينه، تا الدن گئتدي، گؤرمزسن،
لذت ايله بير ده دؤوران سورمزسن،
اهل-اي نشه زومره سينه گيرمزسن،
کاش اؤليدين بو گونلري گؤرونجه.
كؤچورن : آيدا بيات
كيشي تاخما آدي ايله يازان قادين : جورج ائليوت(۱۸۸۰-۱۸۱۹)
اصل آدي ماري آن اوانس (Mary Anne Evans )اولان اينگيليس قادين يازار جورج ائليوت ، ۱۸۱۹ دا دونيايا گلدي. اوشاقليق دؤنمينده سيخي بير دينسل ائييتيمدن گئچدي. آنجاق چوخ گئچمه دن باغيمسيز دوشونجه يولوندا گليشمه گؤستره رک کيليسه دن آيريلدي.
دونيا گؤروشو باخيميندان ياشامي بويونجا اونو ائتکيله ين دوشونورلر آراسيندا ديويد فيريدريش اشتراوس ايلک سيراني آلماقدادير. اشتراوسين " ائلشتيرل بير گؤزله عيسي نين ياشامي " آدلي ياپيتيني چئويرن ائليوت، فريدريك فويئرباخدان دا عيني درجه ده ائتکيلنميشدير. فويئرباخين " خيريستييانليغين اؤزو " آدلي اثريني چئويرن يازار، يارارجي فيلوسوفلارين، اؤزلليکله ده فرانسيز فلسفي پوسيتيويزمي نين باش تمثيلچيسي آقوست كونتون گؤروشلرييله دوشونجه لريني اولوشدورموشدور.
آدي گئچن فيلوسوفلار ائليوتون باش ياپيتي ساييلان " مارت اورتاسي، بير كندلي ياشاميندان " روماني نين اؤزو و ايچريگينه بورژووا پاسيويست فلسفه سينجه بليرلنن بير دونيا گؤروشو دامغاسيني وورموشدور. بو ياپيتلاردا آغير باسان بتيمله مه طرزي چؤزومله ييجي بير طرز اولوب، بو طرزي يازارين يئگه له ميش اولماسي نين باشليجا ندني كيچيك بورژووا و قيرسال ياشامي آنلاتيرکن آچيغا چيخان کاراکترلرين دگريني و سوندوقلاري باخيش آچيسيني سيناماق ايستمه سيندن قايناقلانماقدادير.
ائليوت، بيره يين اخلاقي-ائتيک يؤندن يئتکينلشمه سي نين پسيکولوژيک اولاراق چؤزومله نيشينه يئر وئرن، مکانيک بير آيرينتي گرچکچيليگي گليشديرميشدير. " رومولا " و " راديکال فليكس هولت " رومانلاريندا ايسه تاريخسل اولايلاري قونو آلميشدير، ايلکينده 15. يوزايل سونوندا ايتالياداکي اولايلاري؛ ايکينجيسينده ايسه اينگيليسده اوي هاققي نين الده ائديلمه سييله ايلگيلي اولاراق 1832 ايلينده ائديلن موجادله لري آنلاتميشدير.
ائليوتون، " گوته نين ياشامي " آدلي ياپيتي بوگون ده استاندارد بير بورژووا ياشام اؤيکوسو اولاراق قبول ائديلير و بو ياپيت اونلو ائلشتيرمن و يازار هئنري لوئيس ايله بيرليکده وار اولموشدور.
اثرلري
رومان:
آدام بيد (Adam Bede 1859)
قيييداکي دگيرمان (The Mill on the Floss, 1860)
سيلاس مارنر، راوالولي توخوماجي (Silas Marner, the Weaver of Ravaloe, 1861)
رومولا (Romola 1862)
راديکال فليكس هولت (Felix Holt, The Radical, 1866)
دانيل دئروندو (Daniel Derondo 1876)
حيكايه :
کيليسه ياشاميندان گؤرونوملر (Scenes from Clerical Life, 1857)
قارداش و باجي ، سونه لر (Brother and Sister, Sonnets)
شئعير:
اسپانيول قاراچيسي (The Spanish Gipsy, 1868)
جورج ائليوتون ، " آه قاتيلابيليرمي يم بو گؤرونمز کورويا ؟ "
آدلي شئعيردن بير بؤلوم…
آه قاتيلابيليرمي يم بو گؤرونمز کورويا ؟
وارليقلارييلا گؤزللشديرديکلري ذئهينلره
يئنيدن دوغان بو ابدي اؤلولره
جؤمردليک اوچون آتان قلبلره
جسارتله دوغرويا قوشان بدنلره
منجيلليکله بيتن هر سفالتي کيچيمسمه لره
گلجگي دلن اولدوزلار كيمي دوشونجه لره
و بوتون نايفله ليکلرييله قولاغينيزا پيچيلدايان
سيزي انگين دنيزلره چاغيران
بو گؤرونمز کورويا
قاتيلابيلير مي يم بير گون من ده؟
بئله ياشاماقدير جنّت:
دونيا اوزرينده اؤلومسوز بير بسته…
حاضيرلايان : آيدا بيات
ايكي شئعير جمال ثوريادان
وار
بو سنين بولوتسو سسين وار يا
اوجدان اوجا ترس اوز ائدير گئجه ني
ياتاقلار وار قونوشماق اوچون
اؤپوشمک اوچون تلفون کولوبه لري
گونشلر وار، اولدوزلار، سامان يوللاري،
قارپيزلار گومبور گومبور قاپيلاردا.
تانريلار سوفره سي آما قارانليق
يئيه مم تک لوخما يئيه مم اوردا.
بو سنين توتقولو سسين وار يا:
اورتاق گوزلليک آرتي يارا ايزي.
توتار اللريندن قالديريرسان
آدي کؤتويه چيخميش توم سؤزجوکلري.
يئني تؤرنلر گرک بيزه
يئني تؤرنلر -کيمي زامان ان اسکي.
درد ائتمه، بوتون ديللري ايچرير
بيتکي قونومو، كيچيك باش حئيوان سسي.
بو سنين دولاييق سسين وار يا
دوندورما يئين گوربوز بير قيز كيمي موستهجن،
بالکون دميرينه دايالي بير آرخا قدر شاقاجي،
ايلک دويومداکي كيمي ياشيل آلما داديندا.
کيمليک دئنتيمي ياپتيقدان سونرا
رسيملي رومان اوخويان بير ار كيمي گئدريجي.
بو سنين آلچاقدان سسين وار يا
پنجره لر وار بورنومون کميگينده سيزي،
عشقلار وار اونوتولماماق اوچون،
بوغولماق اوچون ايلک سئوگيلي.
بو بيزيمكي
ييخيجي بير عشق بو،
ييخير ميلتين اورتاسينا
توتقو يوکونو.
بؤلوجو بير عشق،
اکمگي سويو بؤلور
گونده اوچ اؤيون.
خايين بير عشق بو،
سيزين ائوه خيرسيز گيرر
اونونکينه پوليس.
ياساديشي بير عشق بو،
ائولنمگي
هيچ مي هيچ دوشونمور.
سويغونچو بير عشق بو،
ان سيرادان ازگيلردن
سئوينجلر دئوشيرير.
کؤکو ديشاردا بير عشق،
دانته ايله بئاتريسينکينه
فنا اؤيکونور.
ايشغالچي بير عشق بو،
سامانليق سئويشه نين دئيير.
باشقا شئي دئمير.
جمال ثوريا(۱۹۹۰-۱۹۳۰)
فلسفه ائكيبي اينتئرنئت درگيسي
سايي 2 : مودئرنيسم ، پوست مودئرنيسم
سايي 5: ائتيك و ايكيله مه لريميز
سايي8: بيلگي ندير ؟ دوغرو! بيلگي اولاناقلي مي؟
سايي 10: توكَتيم ، توكتمك ، توكنمك
سايي 11: آنلام، آنلاما، آنلاماق
اوغوز ائلی نین خانیملاری
ساري دونلو سئلجان خاتون ، ائلچين مامئدوو ۱۹۸۰ باكي
اوغوز ائلی نین خانیملاری
یازان : کامران علی یئو
" دده قورقود " ائپوسو بيزه بللي اولان بوتون قهرمانليق و وطنپرورليک مضمونو ايله بيرگه قالين اوغوز ائلي نين دوشونجه سيستئميني ده کيفايت قدر نوماييش ائتديرير. آما مسله اوندا دئييل کي، هر بير فولکلور نومونه سي، ياخود فولکلور آبيده سي خالق تفکورونون جانلي اينعيکاس فورماسيدير، هم ده معنا و مطلب اوندادير کي، خالق تفککورونون قورويوجوسو اولان ائپوس متني خالقين همين متنده آچيق شکيلده ايفاده ائده بيلمه ديگي بير سيرا فيکيرلرين ده موحافيظه مکانيدير.
" دده قورقود " ائپوسوندا قهرمان اوغوز ايگيدلري ايله ياناشي داها قاباريق فورمادا گؤرونن و بعضي مطلبلرين ايدئيا داشيييجيسي اولان قادين اوبرازلاري دا واردير. اونلاردان اوچونون آدي آچيقجا بلليدير: بورلا خاتون، بانوچيچک، سئلجان خاتون. بير نئچه سي نين ايسه آدي دئييلمه سه بئله همين قادينلارين دا ائپوسون استروکتورونداکي يئري و مؤوقئعيي آيدينجا سئزيلير. بو سيرايا ديرسه خانين، دلي دومرولون و سيرگين خانيملاري داخيلدير. بس موختليف بويلاردا نقل ائديلن حاديثه و احوالاتلارلا باغلي اولان بو خانيملار ائپوسون متنينده اؤز فونکسييالاري موقابيلينده نئجه تصوير و تقديم اولونورلار؟
سايجا بيرينجي اولان " ديرسه خان اوغلي بوغاج " بويوندا سون درجه قايغيلي گؤرونن و جيدي ناراحاتليق کئچيرن ديرسه خان اؤز خانيميني بئله وصف ائدير:
" برو گلگيل، باشوم بختي، ائووم تختي!
ائودن چيقوب يوريينده سلوي بويلوم!
توپوغيندان سارماشاندا قارا ساچلوم!
قورولو يايا بنزر چاتما قاشلوم!
قوشا بادام سيغمايان تار آغيزلوم!
گوز آلماسينا بنزر آل ياناقليم! "
بو تصوير بير اوغوز خانيمي، ياخود کونکرئت اولاراق بو خانيمين گؤزلليگي باره ده تام و بيتکين تقديماتا برابردير. باشقا سؤزله، همين پوئتيک پارچادا ديرسه خانين خانيمي نين اعجازکار بير پورترئتي جيزيلميشدير. آداما ائله گلير کي، شرطي اولاراق جيزيلان پورترئتده خانيمين سرو بويو، قارا ساچي، چاتما قاشي، دار آغزي و آل ياناغي آچيقجا گؤرونور. حتّی ديرسه خانين خانيمي نين قيرخ اينجه بئللي قيزلا اوغلونون آختاريشينا چيخماسي فاکتيني دا نظره آلساق، بو حالدا " اينجه بئل " ايفاده سيني ده هئچ بير ترددود ائتمه دن اونون وصفينه عاييد ائتمک اولار. فولکلور عنعنه سينه گؤره بو تصوير متنين هانسي حيصه سيندسه تکرار ائديلمه ليدير و ائله بئلجه ده اولور. ثوبوت اوچون قازان خانين خانيمي بورلا خاتونون تصويرينه ديقت يئتيرمک کيفايتدير:
" بويي اوزون، بئلي اينجه بورلا خاتون بوينيله قولاغين آلدي، دوشدي.
گوز آلماسي کيبي آل ياناغين توتدي، ييرتدي.
قارغو کيمي قارا ساچيني يولدي " .
ائپوسون متنينده باشلانان تصوير عنعنه سي، ياخود ايکي اوغوز خانيمي نين – ديرسه خانين قاديني نين و بورلا خاتونون ظاهيري باخيمدان اوخشارليغي آچيق-آيدين حيسس ائديلير: اوجا بوي، اينجه بئل، آل ياناق، قارا ساچ. ساده جه اولاراق، ديرسه خانين خانيمي نين تصويرينده اولان " چاتما قاش " و " دار آغيز " ايفاده لري بورلا خاتونون تقديماتيندا يوخدور. ديرسه خانين خانيمي نين تصويري ايله بورلا خاتونون تصويري نين موقاييسه سينده اورتايا چيخان بو فرقليليک ( " چاتما قاش " و " دار آغيز " ايفاده لري نين اولماماسي!) بورلا خاتونون تصويري نين ناتامامليغي دا دئمک دئييل. يعني بو تصويرلر ايکي اوغوز خانيمي نين بير-بيري ايله ظاهيري اوخشارليغيني سوال آلتينا سالمير و اونلارين بنزييشينه قطعييين خلل گتيرمير. يعني ديرسه خانين خانيمي نين دا، بورلا خاتونون دا تقديمينه عاييد اولان هر ايکي متنه بير سؤيله ييجي نين دانيشيغي، ياخود بير سؤيله ييجي نين ايفاسي کيمي باخماق داها دوغرودور.
آما همين نومونه لرده نظره چارپاجاق و جيدي خاراکتئرده اولان فرق ده آچيق-آشکار گؤرونور. بو اساس و اهميتلي فرق ايسه ظاهيري ائففئکته عاييد اولسا بئله داها چوخ داخيلي مضمون و ماهيت داشييير. صؤحبت بورلا خاتونون آدي نين قارشيسيندا بوتون متن بويو ايشله ديلن " بويو اوزون " ايفاده سيندن گئدير. هم موقاييسه، هم ده آيدينليق اوچون قئيد ائدک کي، بورلا خاتوندان فرقلي اولاراق سئلجان خاتونون آدي نين قارشيسيندا ايشله ديلن " ساري دونلو " ايفاده سي کيفايت قدر دايانيقلي و ثابيت دئييل. بئله کي، " قانلي قوجا اوغلو قانتورالي " بويوندا 5 دفعه " ساري دونلو سئلجان خاتون " ، 5 دفعه " ساري دونلو قيز " ، 10 دفعه ايسه آيريجا اولاراق " سئلجان خاتون " ايفاده سينه راست گلينير. آما " بويو اوزون بورلا خاتون " ايفاده سي " ديرسه خان اوغلو بوغاج " بويوندا 4 دفعه ، " قازان بگ اوغلي اوروز بگين توتساق اولديغي " بويدا ايسه 3 دفعه عئيني فورما و قليبده تکرار ائديلير. حتّی بو مسله ايله باغلي داها ماراقلي جهت " قام بؤره نين اوغلي بامسي بئيرک " بويوندا موشاهيده اولونور. بورادا دا " بويو اوزون بورلا خاتون " ايفاده سينه عئينن اولکيلر کيمي بير يئرده راست گلينير. سونرا ايسه 2 مقامدا بورلا خاتون آدي " بويو اوزون " ايفاده سيندن تجريد اولونور و بو، او زامان باش وئرير کي، قازان خان اؤز بيليگيني بير گونلوک بئيره گه حواله ائتميشدير.
بئله ليکله، تام تصديق ائديلير کي، " بويو اوزون بورلا خاتون " موراجيعتينده سؤيله ييجي نين مسله يه آچيق و بيرباشا موناسيبتي قاباريق شکيلده اؤزونو گؤسترير و " اوجا بوي " معناسيني وئرن " بويو اوزون " ايفاده سي قازان خانين خانيمي و باياندور خانين قيزي بورلا خاتونون بيرينجي خانيم استاتوسونا ماليک اولماسينا ايشاره دير. يعني بورلا خاتونون آدي نين قارشيسيندا " بويو اوزون " ايفاده سي نين آرديجيلليقلا و سيستئملي شکيلده ايشله ديلمه سي تصادوفي سجيييه داشيمير و متنده کي تصويري چالار بورلا خاتونون هم عاييله ده کي ، هم ده جمعيتده کي مؤوقئعييني کيفايت قدر سرراست ايفاده ائدير.
بس بانوچيچگين و سئلجان خاتونون تصويري، ياخود تقديمي نئجه دير؟ بو مقامدا بئيرگين بانوچيچه يه اوز توتوب سؤيله ديکلريني خاطيرلاياق:
" قارغو کيبي قارا ساچين يولدينمي، قيز؟!
قارا گؤزدن آجي ياش دؤکدينمي، قيز؟!
گوز آلماسي کيبي آل ياناغين ييرتدينمي، قيز؟! "
بئيرک حقيقتي بيلمک اوچون بانوچيچگه وئرديگي سواللاري تصويرين آلت قاتيندا يئرلشديرير. يعني بانوچيچگين قارا ساچلي، قارا گؤزلو، آلما کيمي آل ياناقلي اولماسي سوالدان قاباق و آچيق-آيدين گؤرونور. ماراقليدير کي، بانوچيچک ده محض بو سواللارين موقابيلينده بئيره گه عونوانلاديغي تصديق ائديجي جاوابيني محض اؤز تصويري نين آلتيندا گيزلتمه لي اولور:
" قارغو کيبي قارا ساچوم يولدوغوم چوق.
گوز آلماسي کيبي آل ياناغيم ييرتديغيم چوق " .
بانوچيچگين تصويرينده عنعنه دن گلن، يني ديرسه خانين خانيمي نين و بورلا خاتونون تصويريندن سييريليب قالان بعضي مقاملار تکرار ائديلير. آما بو تصويرده " سرو بوي " ، " چاتما قاش " ، " دار آغيز " ايفاده لرينه راست گلينمير.
سئلجان خاتونون تصويرينه گلديکده ايسه قانتورالي اونون گؤزلليگي حاقيندا آشاغيداکيلاري سؤيله يير:
" يالاب-يالاب يالابيينان اينجه تونلوم!
يئر باسميييب يوروين،
قار اوزرينه قان تامميش کيبي قيزيل ياناقليم!
قوشا بادام دار آغيزلوم!
قلمچيلر چالديغي قارا قاشليم!
قورماسي قيرق توتام قارا ساچليم! "
آرتيق بورادا بانوچيچکله موقاييسه ده " آل ياناق " ، " دار آغيز " ، " قارا قاش " ، " قارا ساچ " ايفاده لري برپا اولونور، حتّی بئله دئمک مومکونسه، ديرسه خانين خانيمي نين تصويرينه ده تام ياخينليق حيسس ائديلير. آما ايستر ديرسه خانين خانيمي نين، ايستر بانوچيچگين، ايسترسه ده سئلجان خاتونون تقديمينده بورلا خاتونا عاييد اولان " بويو اوزون " ايفاده سيندن اولدوغو کيمي ايستيفاده يه سون درجه احتياطلي ياناشيلميش، اصلينده ايسه همين ايفاده ايستيفاده سيز قالميشدير. بو ايسه، شوبهه سيز، بورلا خاتونون استاتوسو ايله باغلي مسله دير.
تحليللر گؤسترير کي، اوغوز ائلي نين خانيملاري نين تصويرينده موشاهيده اولونان پارلاق بير تشبئه موعين فرقلرله هميشه تکرارلانير و بوتون خانيملارا عاييد ائديلير. بو، آلما ياناقلا باغلي اولان مشهور تشبئهدير:
1. " گوز آلماسينا بنزر آل ياناقليم! " – بو، ديرسه خانين خانيمينا عاييددير.
2. " گوز آلماسي کيبي آل ياناغين توتدي، ييرتدي " – بو، بورلا خاتونا عاييددير.
3. " گوز آلماسي کيبي آل ياناغين ييرتدينمي، قيز؟! " – بو، بانوچيچگه عاييددير.
4. " قار اوزرينه قان تامميش کيبي قيزيل ياناقليم! " – بو، سئلجان خاتونا عاييدير.
احتيمال ائتمک اولار کي، خانيملارين ياناغي نين بعضاً گوز (پاييز) آلماسي، بعضاً ده قيشدا قار اوزرينه دامميش قانلا موقاييسه سي مؤوسومي خاراکتئرله باغليدير. يعني سؤيله ييجي نين متني پاييزدا، ياخود قيش آيلاري نين بيرينده سؤيله مه سيندن ايره لي گلميشدير.
بئله ليکله، اوغوز ائلي خانيمينا عاييد تصويرين ائتالون واريانتيني برپا ائتمک اولار:
" برو گلگيل، باشوم بختي، ائووم تختي!
ائودن چيقوب يوريينده اينجه بئللي، بويو اوزون، سلوي بويلوم!
توپوغيندان سارماشاندا قورماسي قيرق توتام قارغو کيبي قارا ساچلوم!
قلمچيلر چالديغي، قورولو يايا بنزر قارا قاشلوم، چاتما قاشلوم!
قوشا بادام سيغمايان تار آغيزلوم!
گوز آلماسينا بنزر، قار اوزرينه قان تامميش کيبي آل، قيزيل يانانقليم! "
يئني بير سوال مئيدانا چيخير: بس بو تصويرلر ائپوسون پوئتيکاسيندا هانسي آندا، هانسي مقامدا مئيدانا چيخير؟ بري باشدان قئيد ائدک کي، همين تصويرلر خوش احوالي-روحيييه وضعيتلريني خاطيرلاتسا دا، اصل حقيقت تاماميله بامباشقادير.
ايلک بويدان بللي اولور کي، ديرسه خان ديگر اوغوز بيلري ايله بيرليکده بايوندور خانين مجليسينه گليبدير. آما بورادا گؤزله نيلمز حاديثه باش وئرير: ديرسه خاني قارا اوتاغا آپاريرلار و بئله ليکله، آغ و قيرميزي اوتاقدا اوتوران بيلرله موقاييسه ده ديرسه خان بير نؤو تحقير ائديلير. سبب ايسه اونون اؤولادي نين اولماماسيدير. مسله نين جيديليگي اوندان عيبارتدير کي، ديرسه خانين اؤولادسيزليغي ايندييه قدر يادا دوشمه ديگي اوچون هئچ بير واختدا ناراحاتچيليق تؤرتمه ميشدير. ديرسه خانين اؤولادسيزليغي نين قاباريق شکيلده اوزه وورولماسي نورمال گؤرونن وضعيتي تاماميله دييشير و ديرسه خان حياتلا اؤلوم آراسيندا قالير. محض بئله بير واختدا – حياتلا اؤلومون موباريزه سي سون درجه کسکينلشديگي زامان ديرسه خان خانيمي ايله قارشيلاشير و يوخاريدا خاطيرلاديغيميز تصوير اونون اؤز ديليندن سؤيله نير: " برو گلگيل، باشوم بختي، ائويم تختي... "
قازان خانين خانيمي بورلا خاتونا گلديکده ايسه معلومدور کي، او، کافيرلر طرفيندن اسير گؤتورولور. شؤکلو مليک اسيرليکده اؤزونو گيزله دن بورلا خاتونون 40 اينجه بئل قيز ايچريسيندن تاپيليب موعينلشديريلمه سي اوچون تاپشيريق وئرير کي، اوروزون اتيندن قووورما بيشيريب قيزلارين قارشيسينا قويسونلار، هر کيم يئمه سه ، او، بورلا خاتوندور. دئمه لي، بورلا خاتون (داها گئنيش معنادا قازان خان و اوغوز ائلي!) حياتلا اؤلوم آراسيندا قالير. محض بئله بير واختدا اونون گؤزلليگي نين تصويري و تقديمي مئيدانا چيخير: " بويي اوزون، بئلي اينجه بورلا خاتون بوينيله قولاغين آلدي، دوشدي " .
ياخود بانو چيچگين تصويري نين واختي و زاماني او آنا دوشور کي، بانوچيچگي باشقا بيريسينه اره وئريرلر و 16 ايل اسيرليکده قالان بئيرک توي مراسيمينه گليب چيخير. اصلينده توي مراسيمي بئيرکله بانوچيچگين حياتلا اؤلوم آراسيندا قالماغي دئمکدير. بو قارشيلاشما گئنيش معنادا دوغرو ايله يالانين قارشي-قارشييا گلمه سيدير و اوغوز ائلي اوچون حلل ائديجي مقامدير. محض ائله بو مقامدا دا بئيرگين ديليندن بانوچيچگين تصويري وئريلير: " قارغو کيبي قارا ساچين يولدينمي، قيز؟! "
و ياخود قانتورالي ايله سئلجان خاتون عاييد اولدوقلاري بويون آخيريندا اوز-اوزه گليرلر. حتّی ايکي سئوگيلي نين بير-بيري ايله ووروشماق مقامي دا يارانير. باشقا سؤزله، اونلارين هر ايکيسي حياتلا اؤلوم آراسيندادير. محض ائله بو واخت قانتورالي نين ديليندن سئلجان خاتونون تعريفي ائشيديلير: " قار اوزرينه قان تامميش کيبي قيزيل ياناقليم! "
خاطيرلاداق کي، هم دلي دومروللا خانيمي، هم ده سيرکله خانيمي آراسيندا دا حياتلا اؤلومون سرحددي گؤرونور. بئله کي، دلي دومرول اؤلوم قاباغي خانيمي ايله حالاللاشماق ايسته يير، سيرک ايسه خانيميني گردکده قويوب قارداشيني خيلاص ائتمگه، بير نؤوع اؤلومه گئدير. يعني هر ايکي مقام حياتلا اؤلوم آراسيندا قالماق مقاميدير. ايندي نتيجه چيخارماق اولار کي، دلي دومرولون دا، سيرگين ده اؤز خانيميني تصوير ائتمک، تعريفله مک اوچون بديعي شراييط وار ايميش، آما اونلار بو شراييطدن ايستيفاده ائتميرلر. ندنسه، سؤيله ييجي ده بئله بير شانسي الدن اؤتورور.
اوچونجو سوال: بس بو خانيملار اصلا کيملري تمثيل ائديرلر و اونلار هارادان اوغوز ائلينه گلين گلميشلر؟
ديرسه خانين خانيمي ديرسه خانا اوز توتاراق دئيير:
" آزغون دينلو کافره بن واراييم،
يارالانوب قازليق آتيمدان ائنمه يينجه،
يئنومله آلجا قانيم سيلمه يينجه،
قول-بود اولوپ يئر اوستينه دوشمه يينجه،
يالنوز اوغول يوللاريندان دؤنمييه ييم " .
کافرلرين آچيقجا يامانلانماسيندان بللي اولور کي، ديرسه خانين خانيمي کافر دوشرگه سيندن دئييل.
يئنه ده خانيمي ديرسه خانا سؤيله يير:
" خان بابامين گؤيگوسي!
قادين آنامين سئوگيسي!
آتام-آنام وئرديگي،
گؤز آچوبان گؤرديگيم،
کؤنول وئريب سئوديگيم، آ ديرسه خان! "
يئنه ده ديرسه خانين خانيمي نين اؤزونو خان قيزي کيمي نظره چارپديرماسي ديش اوغوزدان دئييل، محض ايچ اوغوز قيزلاريندان اولماسي نين تصديقيدير. دئمه لي، ديرسه خانين خانيمي ايچ اوغوزون اؤزوندندير.
بورلا خاتونا گلديکده ايسه بو خانيمين دا ايچ اوغوزدان اولماسي گون کيمي بلليدير، چونکي او، باييندير خانين قيزيدير.
بئيرگين خانيمي بانو چيچگين کيمليگيني موعينلشديرمک اوچون " قام بؤره نين اوغلي بامسي بئيرک " بويونون اولينه ديقت يئتيرمک لازيمدير. بورادان آيدين اولور کي، ايچ اوغوزلا ديش اوغوز بيلري باييندير خانين صؤحبتينه ييغيشميشلار. بايبؤره بَي نيسگيلليدير، چونکي اونون اوغلو يوخدور. بيلر بير آغيزدان دوعا ائديرلر کي، اونون اوغلو اولسون. بو زامان بايبيجان بَي ده قيز آرزوسوندا اولدوغونو بيلديرير و سؤيله يير کي، قيزي اولسا، اونو بايبؤره نين اوغلونا وئره جکدير. غئيري-سليس منطيقه گؤره بايبؤره اوغول ايسته ديگينه گؤره او، ايچ اوغوزدان، بايبيجان بي قيز آرزوسوندا اولدوغونا گؤره او، ديش اوغوزدان اولماليدير.
ديگر طرفدن بويون اورتاسيندا اونلارين آرتيق بؤيوموش اوغلو و قيزي – بئيرک و بانوچيچک قارشيلاشيرلار: " چاغيرديلار بئيرک گلدي. بانو چيچک ياشماغلاندي، خبر سوردي. آيدير: " ييگيت، گليشين قاندان؟ " بئيرک دئدي: " ايچ اوغوزدان! " " ايچ اوغوزدان کيمون نسيسن؟ " –دئدي. " بايبؤره بگ اوغلي بامسي بئيرک دئديکلري منم " ،-دئدي. قيز آيدير: " يا نه مصلحته گلدين، ييگيت؟ " -دئدي. بئيرک آيدير: " بايبيجان بگون بير قيزي وارميش، آنني گؤرمگه گلديم! " -دئدي " . بورادا بانو چيچگين " ايچ اوغوزدا کيملردنسن؟ " سورغوسو بانو چيچگين محض ايچ اوغوزدان اولماماسينا ايشاره دير. بو احتيماللار بويون سونونا قدر داوام ائدير و حقيقت تام شکيلده آيدينلاشمير. لاکين ائپوس متني نين باشقا بير يئرينده بو سيررين آچيليشي واردير. بئله کي، سونونجو بويدا آروز دئيير: " بگلر، بئيرک بيزدن قيز آلميشدير، گويگوميزدير. امما قازانين ايناغيدير. گلسون، بيزي قازانلا باريشديرسون. دئيلوم، گتوره ليم؛ بيزه موطيع اولورسا، خوش! اولماز ايسه، بن ساققاليني توتايين، سيز قيليج آشورين پارلن! آرادان بئيرگي گؤتوره ليم. آندان سونرا قازاني له ايشوميز خئيير اولا! " .
بو اوچونجو مقامدا مسله ايله باغلي هئچ بير قارانليق يئر قالمير: بانو چيچک ديش اوغوزداندير! اونا گؤره ده کؤبککسمه اولماسينا باخماياراق، بانو چيچگين آليب گتيريلمه سي ايشينده موعيين شرطلر مئيدانا چيخير. شرطلرين چتينليگي بللي اولاندان سونرا ائلچيلييه دده قورقود گئدير و دلي قارجارين طلبلري يئرينه يئتيريلير. آما چتينليک بونولا دا قورتارمير. بئله کي، بايبئجان قيزيني کافر دوشرگه سيندن اولان بايبورد حاصاري نين بيينه وئره جگيني خئيلي اول بيلديرديگي اوچون بو حاديثه دن خبر توتان کافرلر بئيرگي اسير آپاريرلار. يالنيز 16 ايل کئچندن سونرا بئيرکله بانو چيچک بير-بيرلرينه قوووشورلار.
بس سئلجان خاتون باره ده نه دئمک اولار؟
اونونلا باغلي بويدا نقل اولونور کي، قانتورالي ائولنمک ايسته يير. لاکين اونا ايچ اوغوزدان و ديش اوغوزدان قيز تاپيلمير. آتاسي مجبور اولوب ترابزونا گلير و ترابزون تکورونون گؤزل-گؤيچک قيزي اولدوغوندان خبر توتور. آما او قيزي آلماغين شرطلري ديش اوغوزدان قيز آلماغين شرطلري کيمي چوخ آغيردير. بونون اوچون قودوز آسلاني، قارا بوغاني و بوغراني مغلوب ائتمک لازيمدير. باشقا سؤزله، بئيرگين قارشيلاشديغي سيناقلار موعين فرقلرله قانتوراليني دا گؤزله يير. بو موباريزه ده ايسه قانتورالي اؤزو قاليب گلير.
دئمه لي، ايچ اوغوزدان دئييل، هم ديش اوغوزدان، هم ده کافر دوشرگه سيندن گتيريلن گلينلر اوچون جيدي شرطلر قويولور. آما هر ايکي حالدا ايچ اوغوزون ايگيدلري – بئيرک و قانتورالي قاليب گلير.
بس ائله ايسه دلي دومرولون و سيرگين خانيملاري حاقيندا نه دئمک اولار؟
دلي دومرولون آتا و آناسي اؤولادلاري اوچون جانلاريندان کئچه بيلمه ديکلري حالدا، دلي دومرولون خانيمي اؤز جانيندان کئچمگه حاضيردير و بونونلا دلي دومرولسوز حياتين بوش و معناسيز اولدوغو باره ده قناعتيني بيلديرير. آما دلي دومرولون قادي نين کيمليگينه گلديکده ايسه بو باره ده آيدين تصوورو دلي دومرول اؤزو يارادير: " عزراييل آيدير: " مره، دلي قاوات! دخي نه آمان ديلرسن؟ آغ ساققاللو بابان يانينا واردين، جان وئرمه دي. آغ بيرچکلو آنان يانينا واردين، جان وئرمه دي. دخي کيم وئرسه گرک؟! " –دئدي. دلي دومرول آيدير: " حسرتيم واردير، بوليشاييم " ،-دئدي. عزراييل آيدير: " مره دلي حسرتين کيمدير؟ " آيدير: " ياد قيزي حلاليم وار، آندان منيم ايکي اوغلانجيغيم وار، امانتيم وار، ايسمارلارام آنلارا، آندان سونرا منيم جانيم آلاسان " ،-دئدي " . " ياد قيزي " ايفاده سي دلي دومرولون خانيمي نين کافر دوشرگه سيندن اولماسيني تام ثوبوت ائدير.
سيرگين خانيمينا گلديکده ايسه اولجه " اوچ " و " آلتي " رقملري نين ائپوسداکي فونکسيياسينا ديقت يئتيرک و بري باشدان قئيد ائدک کي، اوچ رقمي و اونون اساسيندا يارانان ديگر رقملر اوغوزو سيمووليزه ائدير:
1. " قازان آيدير: " اوچ يوز ييگيدلن اوغلو اوروز منيم ائويم اوستونه تورسون " ،-دئدي " .
2. " قاراجيق چوبان کافرين اوچ يوزيني ساپان تاشيله يئره بيراقدي " .
3. " سالور قازانلا قاراجا چوبان چاپار يئتدي. چوبانين اوچ ياشار تانا دريسيندن ساپاني نين آياسييدي، اوچ کئچي توييندن ساپاني نين قوللارييدي... اوچ ييلداق تاشي دوشديگي يئرين اوتي بيتمزدي " .
4.اوروز دوستاقليقدان خيلاص ائديلنده " اوچ يوز ييگيت اوغوزدان شهيد اولدو " .
5. " اوچ يوز آلتميش آلتي آلپ آوا بينسه، قانلو کئييک اوزرينه يوريش اولسا، بکيل نه ياي قوراردي، نه اوخ آتاردي " .
6.يئنه بکيل حاقيندا دئييلير: " اوغلاني توناتديلار. آتاسيله-آناسيله گلدي گؤروشدي. اللرين اؤپدي. اوچ ييز ييگيدين يانينا بيراقدي، مئيدانا واردي " .
7.اگرگ سفره چيخاندا " اوچ يوز ساي جيدالو ييگيت بونين يانينا جمع اولدي " .
" آلتي " رقمينه گلديکده ايسه بو رقم و اونون تؤرمه لري آروزو چيخماق شرطي ايله ( " آلتميش ارکج دريسيندن کورک ائلسه، توپوقلاريني اؤرتميين، آلتي اؤگج دريسيندن کولاه ائتسه، قولاغلاريني اؤرتميين... آت آغيزلو اوروز قوجا چاپار يئتدي " ) بوتون حاللاردا کافرلره خاصدير:
1. " شؤکلي مليک آيدير: " آلتي يوز کافر وارسون، قويوني گتورسين " ،-دئدي " .
2. " ناگاهاندان قاراجيق چوبانين اوزرينه آلتي يوز کافر قويولدي " .
3. " اون آلتي بين قارا تونلو کافر آتا بيندي. قازانين اوزرينه آلغار يئتدي. باقديلار گؤرديلر آلتي بؤلوک توز ائندي " .
4.قانتورالي باره ده دئييلير کي، " آلتي جللاد انسه سينه گلديلر " .
5. يئنه قانتورالي اوزرينه هوجوم ائتمه يه حاضيرلاشان تکور حاقيندا سؤيله نير: " مگر خانيم، تکور پئشيمان اولدي. " اوچ جانور اؤلدورديگي اوچون بير قيزجيغازيمي آلدي-گئتدي " ،-دئدي. ايچين قارا تئونلي، گؤگ دمورلي آلتي يوز کافر سئچدي، گئجه-گوندوز يورتديلار. ناگاهاندان يئتديلر " .
6. " اول قله نين بير تکورو وار ايدي. آدينا آرشون اوغلي ديرک تکور دئرديلر. اول کافرين آلتميش آرشون قامتي واردي. آلتميش باتمان گورز سالاردي " ؛ ياخود: " اول آلتميش باتمان گورزله قازيليق قوجايا دپره توتيب چالدي. يالان دونيا باشينا تار اولدي " .
7.کافرلرين سيره يه قارشي هوجومو باره ده بئله سؤيله نير: " کافر تکور آيدير: " قاتلان، مره قاوات اوغلي، من سانا واراييم! " -دئدي. آلتي پرلو گورزيني اله آلدي، اوغلانون اوزرينه سوردي " ؛ ياخود: " آلتميش ياراقلي آدام سئچديلر، وارديلار. ناگاهاندان آلتميش دمير تونلو کافر اوغلانين اوزرينه گلديلر " . " سيرک ده " قيليج چکوب آلتي کافر دپله دي... "
ايندي اسيرليکده قالان خانيميني خيلاص ائتمه يه يوللانان سيرکله خانيمي آراسينداکي ديالوقو خاطيرلاييريق. سيرگين خانيمينا سؤيله ديکلرينه شئعير فورماسيندا نظر سالاق:
" قيز، سن مانا بير ييل باقغيل!
بير ييلده گلمزسم، ايکي ييل باقغيل!
ايکي ييلده گلمزسم، اوچ ييل باقغيل!
گلمزسم، اول وقت منيم اؤلدوگيمي بيله سن.
آيغير آتيم بوغازلايوب، آشوم وئرگيل!
گؤزون کيمي توتارسا، کؤنلون کيمي سئورسه، آنا وارغيل! "
اوچ رقمي اوغوزلارا عاييد اولدوغونا گؤره اوغوز ايگيدي سيرک ده محض ساييب-ساييب اوچده دايانير: " ايکي ييلده گلمزسم، اوچ ييل باقغيل! گلمزسم، اول وقت منيم اؤلدوگيمي بيله سن " .
ايندي ايسه سيرگين خانيمي نين سؤزلرينه، داها دوغروسو، اونون سيرگه جاوابينا ديقت وئرک:
" ييگيديم من سانا بير ييل باقام.
بير ييل ده گلمزسن، ايکي ييل باقام.
ايکي ييلده گلمزسن، اوچ-دؤرت ييل باقام.
دؤرت ييلده گلمزسن، بئش ييل، آلتي ييل باقام.
آلتي يول آييردينا چادير ديکم.
گلندن-گئدندن خبر سورام.
خئيير خبر گتورنه آت، تون وئرم،
قافتانلار گئيدورم.
شر خبر گتوره نين باشين کسم.
ارکگ سينگي اوزريمه قونديرمييام.
موراد وئر، موراد آل، آندان گئت، ييگيديم! " .
ماراقليدير کي، سيرک 3-ده دايانماسينا باخماياراق، سيريين خانيمي 6 رقمينه قدر داوام ائدير و 6-دا دايانير: " دؤرت ييلده گلمزسن، بئش ييل، آلتي ييل باقام. آلتي يول آييردينا چادير ديکم " . بئله ليکله، سيريين خانيمي نين دوشونجه سيستئمينده 6 رقه مي اساس يئر توتور. ايندي قطعي شکيلده دئمک اولار کي، سيريين خانيمي دا محض کافر دوشرگه سيندندير.
بئله ليکله، ديرسه خانين خانيمي و قازان خانين خانيمي بورلا خاتون ايچ اوغوزدانديرلار. بانو چيچک ديش اوغوزدان، سئلجان خاتون و دلي دومروللا سيرگين خانيملاري ايسه کافر دوشرگه سيندن ايچ اوغوزا گلميشلر. ديش اوغوزدان و کافر دوشرگه سيندن ايچ اوغوزا گلين گلن قيزلار بو دوشرگه لر آراسينداکي باريشيغي سيمووليزه ائديرلر و باريشيغين کاررانتيديرلار. دئمه لي، " دده قورقود " ائپوسو ووروش و داوانين دئييل، محض باريشيق و واحيد دونيا مودئلي نين ائپوسودور.
کؤچورن : آيدا بيات
قايناق: ۵۲۵ - جي قزئت ، ۲۰۱۰ - ۱ ماي - ص ۲۴-۲۵
يئنه ارگنه قون
يئنه ارگنه قون
داغلار يالقيز
يوللار اؤكسوز
كولك بيزي سسله يير
دميرچي اوغلو دلي حسن
توفنگ تؤكمه يه
دمير آشيغي اريتمه يه گلسين
ايكي قاشين آراسيندان
پاسلي ماهنينی چالسين
آشيق جنون
پاي اولسون تورپاغین آستاري
ياغيلار گلسين
گلن ائيواز
گلن نيگار
دؤورون
اؤز كوراوغلوسو
سؤز كوراوغلوسو
توفنگ كوراوغلوسو گلسين
دليلر
دمير آشيغي اريتمه يه گلسين
دومان بيزي گؤزله يير ...
داش قالاق
مني داش قالاق ائدين
آنا ديليمي سئويرم
سؤيله ييرسه
قفسده كي طوطو.
شاعير
بارماقلاريمدان سوروشون
قولاقلاريملا گؤردوم
گؤزلريمله ائشيتديم
ائركن گئدركن
دَييشيك گئيدي روحومو
سرسم شاعير.
آيدا بيات
